‘Oku fiema’u ‘e he ‘Otua ‘a e mo’oni ‘i he loto’i loto (Saame 51:6) pea kuo ne fekau e tokotaha kotoa pe ke fakatomala (Ngaue 17:30).
Ko e tokotaha angahala kuo pau ke tomu’a fakatomala ia pea toki malava ke ne ma’u ‘a e me’a’ofa ‘o e fakamo’ui (pe fakahaofi mei he mate ta’engata) tu’unga ‘i he’ene tui ‘ata’ata pe (Efeso 2:8-9).
Ko e tokotaha kuo mo’ui mo’oni hono laumalie (fakatomala’i ‘ene angahala) kuo pau ke ako ia ke poto he vete ‘ene angahala mo e mo’ui fa’a fakatomala ka e lava ke ne feohi vaofi mo e ‘Otua (Siope 42:16).
‘Oku ‘ilo ngofua pe ‘a e tokotaha ia ‘oku ako mo ‘ilo lahi ki he tohitapu he ‘oku faingofua ange ki ai ke ne toutou vete mo fakatomala’i ‘ene angahala. Ko hono ‘uhinga he ‘oku mahino ange kiate ia ‘a e natula faka’auha ‘o e angahala pea ‘oku loto leva ia ke fai mo tau’ataina mei ai.
Ko e fakatomala ko e me’a’ofa ia ‘a e ‘Otua (Ngaue 5:31 mo Ngaue 11:18). “Ko e koto lelei kotoa ‘o e ‘Otua ‘oku ne tataki kitautolu ki he fakatomala” (Loma 2:4).
‘Oku malava pe ke ‘ikai hanga ‘e he ‘Otua ‘o foaki mai kiate kitautolu ‘a e ngaahi me’a ke fakahaa’i ‘aki ‘a hono lelei lahi, ka kuo ne ‘osi foaki mai ‘e ia ‘a e me’a’ofa lelei taha ma’a kitautolu, ko e fakamo’ui (pe fakahaofi mei he mate ta’engata) ko e ‘uhi pe ko ‘ene ‘ofa kiate kitautolu.
Ko e fakatomala ko e liliu pe liukava ia ‘oku hoko ‘i hoto loto’i loto tupu mei he ngaue mai ki ai ‘a e fu’u ivi ‘o e Laumalie Ma’oni’oni ke fakamo’oni mo valoki’i ‘i he taimi ‘oku talaki malohi ai ‘a e folofola ‘a e ‘Otua (Ngaue 2:37-38 mo Sione 16:7-11).
‘Oku fakahoko leva heni ‘a e fakatomala mo’oni ki he ‘Otua (‘a ia kuo tau fai angahala ki ai) pea mo e tui ki he ‘Eiki ko Sisu Kalaisi (Ngaue 20:21). Kuo pau ke tau tui kia Sisu Kalaisi ko ia na’e pekia ma’a kitautolu pea telio pea toetu’u mei he mate (1 Kolinito 15:1-4).
Ko e fakatomala ‘oku ne fakangofua mo faka’ata ‘a e tangata ke ne ma’u ‘a e fakamo’ui ka ‘oku toki fakahoko ‘a e fakamo’ui (pe fakahaofi mei he mate ta’engata) tu’unga ‘i he’ete tui kia Kalaisi. Ko e fakatomala mo’oni ‘oku ‘alu loua ma’u pe ia mo e tui. ‘Oku ‘ikai malava ke te tui ki he fakamo’ui ta’e fai ha fakatomala. "Fakatomala ki he ‘Otua pea tui ki he ‘Eiki ko Sisu Kalaisi" ko e ongo tefito’i mo’oni ia ‘oku ‘ikai ala fakamavae’i he taimi ‘oku fai ai ‘a e fakamo’ui pe fakahaofi.
Ko e tui ka e ‘ikai ke te fakatomala ko e malualoi mo e pau’u lotu lahi taha ia, pea ko e fakatomala ka e ‘ikai ke te tui ki he pekia, telio mo e toetu’u ‘a e ‘Eiki ko Sisu Kalaisi ko e matu’aki vale lahi ia.
- ‘Uhinga totonu ‘o e fakatomala ‘ia 2 Pita 3:9.
- Totonu ke malanga’i ‘a e fakatomala (Maake 1:1-4).
- Fakatomala mei he ngaahi ngaue mate - ta’ofi ‘a e ngaahi me’a ‘oku ke fai angahala ai ki he ‘Otua (Hepelu 6:1).
- Fakatomala mo e ‘OTUA. Kuo ‘ofa’i kitautolu ‘e Sisu Kalaisi pea mo fufulu kitautolu mei he’etau ngaahi angahala. Pea kuo ne ngaohi ai kitautolu ko e ha’a tu’i mo e tu’unga taula’eiki ki he Otua ko ‘ene Tamai (Fakaha 1:4-8).
- Ta’emalava ke to e fakafo’ou pe fakafoki ki he Fakatomala (Luke 9:62, Hepelu 6:4-6).
- Mahu’inga ‘o e Fakatomala (Ngaue 17:30).
- Fakamo’oni ‘o e Fakatomala (Ngaue 26:19-20).
No comments:
Post a Comment