Kuo Ke Mateuteu Kiho 'Api Malu

Talateu:

1. Koe ngaahi talanoa fakataataa ni ‘e tolu ‘oku lea ki ai ‘etau lesoni he efiafi ni koe faka’osinga ia ‘oe ngaahi talanoa fakataataa ‘e 7 ‘a Sisu he vahe ni. ‘Oku hangee ‘ae natula ‘oe talanoa fakataataa ko ha feinga ke faka’ilo mai ha ongo mo’oni ‘e ua ‘a ia koe mo’oni ta’e ha moe mo’oni ha mai ‘oku na fononga fakataha holo pe. 
2.  Na’e fakama’opo’opo ‘aki ‘e Sisu ‘ae ngaahi lea fakataataa ni ‘aki ‘ene faka’ilo’i ‘ae iku’anga ‘oe me’a kotoa pe he faka’osinga ‘o e ngaahi kuonga “’E pehee ‘i he faka’osi ‘o mamani ‘e ‘alu atu ‘ae kau ‘Angelo pea te nau vahe’i mai ‘ae kakai Kovi mei honau lotolotonga ‘oe fai lelei..” hange ko ia ‘oku tokanga ki ai ‘etau veesi malanga

Lesoni:

Maitu 13: 49 “’E pehee ‘i he faka’osi ‘o mamani ‘e ‘alu atu ‘ae kau ‘Angelo pea te nau vahe’i mai ‘ae kakai kovi mei honau lotolotonga ‘oe fai lelei..”

Himi:   48/433/ 497

Pule'anga 'o Hevani

1. Koe ha nai ‘ae ‘uhinga ‘oku toutou ngaue’aki mai ‘e Matiu ‘ae “Pule’anga ‘o Hevani” lolotonga ia ‘oku ngaue’aki ia ‘e Ma’ake, Luke mo Sione ‘ae “Pule’anga ‘oe ‘Otua?”
2.  Matamata pe ‘e ala ‘uhinga ‘eni he koe lea “Hevani” koe lea ia ‘oku vaofi mo maheni ai ‘ae kau Siu ‘aee ‘oku toputapu kiate kinautolu ke pu’aki ‘ae Huafa ‘oe ‘Otua.). 
3. Kia Matiu koe “pule’anga ‘oe ‘Otua” ‘oku ‘ikai ke kau ki ai ‘ae kakai kuo te’eki ke fakamo’ui/ fakamolemole ‘enau hia ka koe “Pule’anga ‘o Hevani” ‘oku kau ki ai ‘ae kakai kuo ‘osi fakamo’ui/ fakatomala pea mo  kinautolu ‘oku nau loto ke nau hoko koe kau Kalaisitiane ka ‘oku te’eki ke nau fakamo’oni fakakakato ki ai. Koe fakakaukau ko ‘eni ‘oku fakae’a lelei he talanoa fakataataa ko ia ki he “Tea/Uite” (Maitu 13:24-30, 36-43) pea moe “tenga’i musita” (vv 31-35) pea pehee ki he talanoa fakataataa ki he “uloa” (vv 47-52).
4. Oku ou faka’amu kainga ke tau tomu’a fakatokanga’iange koe lea “Pulela’anga ‘o Hevani” ‘i he vahe 13 ‘o Matiu ‘oku misiteli hono ‘uhinga. ‘Oku ‘ikai talanoa ia ki hono Pule’anga Fakamisaia ‘i mamani ka ‘oku matamata ‘oku lea ia ki ha pule’anga ‘oku ‘i mamani lolotonga ‘ae tatali ‘ae mamani ki ha ‘aho tene toe foki mai. 
5. Koe pule’anga ‘o Hevani koe pule’anga ia ‘oku fio ai ‘ae lelei moe kovi pea moe mo’oni moe loi pea ‘oku ‘ikai ko ha Siasi ia. Koe siasi ‘oku pau ke ‘i loto ai ka ‘oku toe mahulu atu ‘ae fakakaukau ‘oe Pule’anga ‘o Hevani ai. Ko ha kakai ‘oku nau fakahaa’i koe kau kalisitiane kinautolu neongo ‘oku te’eki ke nau fakapapau’i ‘ae lea ko ia. ‘I he ‘uhinga ko ia na’e fai ai ‘e Sisu ‘ae ngaahi talanoa fakataataa ni.

Koe Mata'itofe Mahu'inga Lahi

1. ‘Oku tatau ‘ae pule’anga ‘o Hevani mo ha tangata fakatau mata’itofe pea ‘oku ne fakamoleki hono sino, ‘atama moe laumalie he fekumi holo ke ma’u ‘ae “mata’i tofe lelei” ko ia. Kae fakatatau kia Matiu ‘i he taimi pe na’a ne toe ‘ilo ai ‘oku toe ‘i ai moe “mata’itofe mahu’inga lahi” na’a hiki kotoa ki ai ‘ene tokanga mei he “mata’i tofe lelei” ki he “mata’i tofe mahu’inga lahi.” 
2. Kainga koe fakamatala totonu ia ‘oe “Pule’anga ‘o Hevani” Ko ha kakai ‘oku nau fekumi ta’etuku ki he lelei ‘oe maama ko ‘eni mo hono mahu’inga ‘io ka koe ‘aho pe ‘enau ma’u ‘ae mata’itofe mahu’inga ‘oe mo’ui ni ‘io ‘ae ‘Eiki ko Sisu Kalaisi” pea ‘oku faitu’utu’u ni honau sino loto moe laumalie ke hu’u leva ‘enau tokanga pea hiki fu’u mo hono laumalie ke siofia mo mamata pau ‘ae faka’ofo’ofa ‘oe “mata’i tofe mahu’inga ni ‘io “Tu ‘oku lau ‘ae lelei ‘oe langi hono fu’u mahu mo hono masani ka koe mata ‘o hono koloa ‘ae ha ‘ae ‘Eiki ta’e hano pulonga, ka sio pau lata ai au kau ka sioa ‘a hono fofonga teu toki lata ai au

Koe Koloa Tanu

1. Koe fakamatala ‘a Matiu ki he tatau ‘oe pule’anga ‘o Hevani koha koloa na’e tanu ‘iha ngoue’anga pea koe pea faifai pea ‘ilo ki ai ha tangata pea ne fu’u fiefia pea koe’uhii ko ‘ene mahu’inga’ia he koloa ko ia kuo ne ‘ilo ni na’a ne vekeveke ai ke ne fakatau ‘ae me’a kotoa pe ‘oku ne ma’u kehe pe ke ne ma’u kotokotoa ‘ae koloa kuo ne ‘ilo ni, Sisu ke ke ma’u ma’au ‘eku ngaahi me’a kotoa taleniti ngaahi ta’u fanau fale moe koloa” 
2. Kainga koe koloa ko ia koe “ma’u ‘ae mo’ui ta’engata.” Kainga koe koloa ‘eni na’e fakafisifisi ai ‘ae tangata koloa’ia ke fakatau atu ‘o tufa ki he masiva kapau mo’oni ‘oku ne fiema’u ‘ae “mo’ui ta’engata.” 
3. Kainga koe koloa ‘eni na’e to ai ‘ae lea ‘a Sisu ki he tangata koloa’ia ni “’E fai ngofuaange ‘ae hu ‘ae kameli ‘i ha ava’i hui tuitui ‘i ha hu ha tangata koloa’ia ki he Pule’anga ‘oe ‘Otua. Ki he tangata na’a ne ‘ilo ‘ae koloa ta’emele mo ta’e’auha ni na’e mo’u hivaa pe hono ngutu ‘E Sisu ‘omi ‘ae koloa ha loto fu’u fo’ou koe loto haohaoa koe ‘imisi ‘o’ou, ‘io koe ha ha ngaue ‘aonga koeha ha feilaulau koeha nai ‘e kakunga moe ‘ofa e kuo lau ’ikai ngata ‘i he hiva fasi koe le’o pe ‘atu pe hoto kotoa sino loto, laumalie”

Uloa Na'e To 'i Tahi

1. ‘Oku toki fakama’opo’opo ‘e Matiu ‘ae ngaahi talanoa fakataataa ni ‘e 7 he vahe ni ‘aki ‘ene pehee ‘oku tatau ‘ae pule’anga ‘o Hevani mo ha uloa na’e to ‘i tahi…pea ne ha’o ‘ae ika kotoa pea ‘i he’ene fonu na’a nau ‘omi ia ki he matatahi ‘o toki to’o ‘ae ika lelei kae li’aki ‘ae ika kovi. Koe fakama’opo’opo’anga ‘eni ‘oe ngaahi kuonga he koe ngata’anga ‘oku ua pe hono kakai koe tea pe koe uite moe ika lelei pe ika kovi. Koe fakakaukau ia ‘oe fakama’opo’opo ngaue ‘oe Pule’anga ‘o hevani ke fakahu kinautolu kuo taau ki he Pule’anga ‘oe ‘Otua.

Mahu'inga 'o e Fanongo Lelei

Mahu’inga ‘oe Fanongo lelei ki he ngaahi tala ni. ‘Oku ha tu’o 19 ‘ae lea “Fanongo” he vahe 13 pe ‘o Matiu. Ko hono ofongi ‘ae faka’osinga ‘oe ngaahi tala ni ‘oku fakalea kehekehe’i ai pea toe fakamamafa'i makehe mai he'e ngaahi Kosipeli Kehe 'a e Mahu'inga oe Fanongo Totonu

1. Fakalea 'a Matiu - “Ko ia ‘oku telinga ke ne ongo’i
   Matiu 13:9 - “Na’a ne pehee foki kiate kinautolu,  “Ko ia ʻoku ne telinga ongo, ke ongoʻi ia.”
2. Fakalea 'a Ma'ake  - Tokanga pe koe ha ‘ae me’a ‘oku mou fanongoa
   Ma’ake 4:24- Pea pehē ʻe ia kiate kinautolu, “Tokanga ki he meʻa ʻoku mou fanongo ki ai: he ko e meʻa fuofua te mou fua ʻaki, ʻe toe fua ʻaki kiate kimoutolu: pea ʻe foaki fakalahi kiate kimoutolu ʻoku tokanga
3. Lau 'a Luke - “Ko ia mou tokanga ki he anga ‘o ho’o mou fanongo!..."
   Luke 8:18 - Ko ia mou tokanga ki hoʻomou fanongo: he ko ia ʻoku maʻu, ʻe foaki kiate ia pea ko ia ʻoku ʻikai te ne maʻu, ʻe toʻo meiate ia ʻaia ʻoku ne mahalo kuo ne maʻu.”
4. Lau 'a Paula: Kainga ta koe mahu’inga ‘o hono fai ‘e Sisu ‘ae ngaahi talanoa ni he…
   Loma 10:17 - “Ta ‘oku tupu ‘ae tui mei he fanongo, pea ‘oku fai ‘ae fanongo koe ‘i ai ha folofola ‘a ‘Otua

Koe Ha 'Etau Me'a 'e Ala Fai?

1. Na’e hili kotoa ‘ene lea’aki ‘ae ngaahi talanoa fakataataa ni na’a hu’u leva ‘ene fononga ki Selusalema mo teuteu ai kene taa ‘ae sipinga ‘oe mateaki koe fua e Kolosi. Kuopau ke tau fakaafe’i ‘ae Laumalie Ma’oni’oni ke ne hanga ‘o fakatokanga mai (dedect) ‘ae taimi ‘oku tau ‘unu ai ke fakamahu’inga’i ‘ae me’a ‘oku mahu’inga taha he mo’ui fakangatangata ni. ‘Oku ‘ikai ko ha’atau fai fakamaau:
   Matiu 7:1-5 -  “ʻOUA naʻa mou fakamaau, telia naʻa fakamaaua ʻakimoutolu. 2 He ko e anga ko ia ʻoku mou fakamaau ʻaki, ʻe fakamaaua ai ʻakimoutolu: pea ko e fuofua ko ia te mo fua ʻaki, ʻe toe fua ʻaki ia kiate kimoutolu. 3 Pea ko e hā ʻoku ke tokanga ai ki he malamalaʻi ʻakau ʻoku ʻi he mata ʻo ho kāinga, ka ʻoku ʻikai te ke tokanga ki he fuʻu ʻakau ʻoku ʻi ho mata ʻoʻou? 4 Pea ʻe fēfē haʻo faʻa pehē ki ho kāinga, ‘Tuku ke u toʻoa mai ʻae malamalaʻi ʻakau mei ho mata:’ kae vakai, ʻoku ai ʻae fuʻu ʻakau ʻi ho mata ʻoʻou? 5 Ko e mālualoi koe, tomuʻa, lī ʻae fuʻu ʻakau mei ho mata ʻoʻou; pea te ke toki mamata totonu ke toʻo ʻae malamalaʻi ʻakau mei he mata ʻo ho kāinga.
2.  Kuopau ke tau ngaue’aki ‘etau ongo / mafai fakalaumalie ke tau malava ke ‘ahi’ahi sio ‘aki ‘o ‘ilo’i ‘ae ngaahi faingamalie kotoa ke tau ma’u ai ‘ae koloa fufu ni pea ke tau fakatau mai moe mata’i tofe mahu’inga lahi ni kehe pe ke tau kau he ika na’e fili pea ‘oua foki na’a tau tomui ai ke hu ki hono Pule’anga fakalangi ‘ia Sisu Kalaisi. 
3. Oku fefee ‘eta teuteu ki he Pule’anga ‘oe ‘Otua? “’E ‘oua ‘e mamafa ‘e ‘oua ‘e manakoa he maama ta’emaau ni mo hono ki’i koloa ta nofo ‘aunofo ‘o kumi ha fonua he kolo ma’u tu’unga he kolo he ‘Otua ‘e ‘e si’i ‘api ma’u ko langi ‘a hotau ‘api ma’u” “’Eiki liliu ‘a hoku loto, keu tui ai pe ki ho poto, kae faingofua pe keu talia “Ke fai ho Finangalo ia.” 

 Recommended Reading:

A Quick Look at the Rapture and the Second Coming By Tim LaHaye Will Christ's return be a real event or is it merely symbolic? What signs of the last days can we expect to appear? Join LaHaye as he gives you a glimpse of what's to come! Drawing on decades of research, he offers a concise, trustworthy examination of biblical prophecy to prepare you for the future. 64 pages, softcover from Harvest.

Credits:   Semisi Kava @ FaceBook