Loto'aki 'ae Fekau 'ae Otua

"KE TO MAI KIATE AU"

Senesi 27:11-13; 25:25; Matui 27:25; Loma 9:15,16,18

Na'e ki'i taka momou 'a Sekope 'i he palani mo e fokotu'utu'u 'a 'ene fa'ee.  Ko hono 'uhinga pe ko 'ene 'ilo'i 'a 'ena fu'u faikehekehe pea mo hono ta'okete.  Pea na'a faifai kuo 'ilo 'e he tangata'eiki 'a e kakaa kuo fai pea to ha mala kiate ia.  Ko e pau'u na'e 'uhinga ki ai 'a Sekope, na'a pehe 'e 'Aisake kuo ne pa'usi'i ia koe'uhi ko 'ene kui.  Na'a pehe 'oku ne lau ange pe fakamatalili koe'uhi kuo po'uli 'a hono fofonga.  'A ia 'oku mahino 'a e matu'aki faka'apa'apa 'aupito 'a Sekope ki he'ene 'Eiki, neongo 'a 'ene 'ilo'i kuo he 'a 'ene taki.  Pea ko e ki'i me'a mahu'inga ia 'a e ongo'i 'apasia 'a Sekope kia 'Aisake neongo 'ene 'ilo'i 'a e hala kuo ne fai.  Na'e tatau tofu pe ia mo e fa'a faingamalie 'a Tevita 'i he mo'ui 'a Saula kae 'ikai pe ke ne to'o, koe'uhi pe ko 'ene mamae ki he Pani 'a Sihova.  Na'e fu'u 'a'apa 'aupito 'a Tevita ki he taha kuo fili ke taki.  Ko 'ene ma'ema'ekina ki he tu'unga, he ko e tu'unga 'a e 'Otua (Loma 13:1-5). 

Pe na'e mei fefe kapau na'e tu'uma'u ai pe 'a Sekope 'i he'ene ongo'i lifusia kia 'Aisake, pea ne fakafisinga'i 'a e tu'utu'uni 'a 'ene fa'ee.  Ka e tuku ke fai ange ha sio pe ko e ha 'e fai 'e he 'Otua.  Kae pango ko e ki'i ongo'i momou 'a Sekope na'e 'ikai ke fu'u tuiaki fau.  Na'a ne kamata pe ke manga atu 'i he tui ko ia ne tala 'e hono konisenisi, pea ne ongo'i fo'i pe 'o toe holomui.  'Ikai 'oku fa'a pehe pe kitautolu.  Taimi 'e ni'ihi 'oku 'i ai 'a e ngaahi me'a 'oku fokotu'utu'u mai ke fai, pea te ongo'i 'e kita 'oku hange 'oku ki'i taka fehalaaki, pea te feinga ke 'oua 'e fai kaekehe kuo te holomui pe 'i he malohi mai 'o e 'atakai.  Pea 'oku mahino 'a e totonu ke pau 'a 'ete tu'u 'i he 'Otua, ke 'oua te te toe ngaue ka e tu'u 'i he me'a 'oku talamai 'e he konisenisi 'oku tonu 'o tatau ai pe pe ko hai 'oku vili mai ke fai. 

Ka ko Lepeka foki, 'a e na'a ne ma'u tonu 'a e fekau mei he 'Otua, na'e fakanatula pe kiate ia ke matu'aki mata'a ke fakahoko 'a e me'a na'e fanongo tonu ki ai 'a hono telinga.  Pea 'oku tau tuku 'a e kololia ki he 'Otua ko e tuitala mo tokanga na'e fai 'e Lepeka telia 'a e 'Otua.  Pea tau sio ai foki ki he tonu 'o e fili'i 'o Lepeka ke ne hoko ko e uaifi 'o 'Aisake.  Kapau e na'e mali 'a 'Aisake mo ha taha Kenani, hange ko 'Isoa, pehe na'e 'ikai ha taha ke kavekave a'u 'a 'ene tu'u 'i he ki'i famili ni lolotonga 'a e fo'i vaa'ihala ni.  Pea 'oku 'a'asili ai pe 'a 'etau falala ki he fokotu'utu'u 'a e 'Otua.  'A 'Ene tokoni'i 'a Lepeka.  Ka neongo ia kuo 'ikai ke tukuange 'e Lepeka ki he 'Otua ke fai pe 'e Ia 'a e me'a 'oku Ne finangalo ki ai. 

Ko e konga foki 'e taha 'a e momou 'a Sekope na'a to ha mala kiate ia.  'A ia 'oku mahino mei ai 'a e 'ikai ke 'uhinga totonu 'a 'ene momou.  Ko 'ene manavasi'i pe 'ana ki he tautea.  Mate ia 'i he fiema'u 'o e tapuaki, ka 'oku manavasi'i ia na'a 'ikai ke lava kae kau kovi kiate ia.  Pea na'e fefusiaki ia 'i he ongo fo'i kovi 'e ua.  'I he fa'ahi 'e taha ko e manumanu ki he tapuaki, pea tafa'aki 'e taha 'oku ilifia na'a kau kovi ha me'a kiate ia, ki hono kita.  Pea ne'ine'i 'a e 'ikai ke fu'u malohi 'aupito 'a e tafa'aki 'a'apa 'a hono konisenisi ke fai ha pau'u ki he'ene 'Eiki. 

Ka ko 'eni kuo talaange 'e Lepeka ia ka 'i ai ha mala pea tukuange ke to kiate ia.  'Oku tau malie'ia ai, 'i he fokotu'u 'a Lepeka he ko e fakakaukau ki he me'a ko e mala 'i he taimi ko ia, ko e fu'u me'a lahi 'aupito ia, ka ko 'eni kuo pole 'a Lepeka ke ne fua 'a e hia.  Pea ko ha fakakaukau kalusefai lahi ia.  Ka ko e me'a foki 'oku mahino 'a e kei tu'uaki ai pe 'e Lepeka 'a e kaveinga 'a e 'Otua ke 'oange mo'o Sekope 'a e tapuaki.  Pea neongo 'a 'etau faka'amu ke 'oua te ne ala ke fai a' e me'a 'a e 'Otua ka 'oku tau tangane'ia 'i he'ene ta mo e feinga ke mateaki'i 'a e mo'oni 'oku ne tui ki ai.  Pea 'oku tau tui ko e 'uhinga ia na'e 'ikai ke houhau ai 'a e 'Otua ki he me'a na'a na fa'ufa'u.  Na'e faka'atu'i pe 'a e 'Eiki 'a hona ngata'anga, he ko e me'a tepuu 'a e fo'i mo'oni na'e fai ki ai 'a e kaveinga 'i he 'aho ko ia.  He ko hona lelei taha, 'a e me'a na'a na a'u ki ai, ko ia pe na'e fai, neongo 'i he anga 'o 'etau sio 'oku hala, ka na'e faka'atu'i pe mo fai meesi pe 'a e 'Otua hei'ilo te nau mo'ui kotoa kae tuku kehe pe foki 'a 'Isoa kuo ne va'inga'aki 'a 'Ene koloa.

Akonaki: Loto'aki 'a e Fekau 'a e 'Otua