TAKI TAHA MA'ANA
Senesi 27:6-10; Matiu 12:25&30; Sione
17:21-23
Ko e 'aho fakamamahi 'eni
ki he ki'i famili 'oku fa'o ai 'a e Mo'oni 'a e 'Otua. Kuo taki taha
ma'ana 'a e ongo matu'a. Kuo na taki taha hona loto mo 'ena me'a 'oku
sai'ia ai. Tu'utu'uni 'e he taki 'o e famili 'a e tama lahi 'a e me'a ke
ne fai. Pea fai 'e he tokoni taki 'a e tu'utu'uni makehe 'e taha ki he
si'i 'a e me'a ke fai ke veuki kae fa'ao ai 'a e me'a ko ia kuo teu 'omai mei
he Tamai.
'Oku te'eki pe ke
fakafiemalie 'a e 'uhinga na'e vilitaki ai 'a 'Aisake kia 'Isoa hili 'a 'ene
'ilo ko Sekope 'a e finangalo 'o e 'Otua. Pea kapau ko hono mo'oni e 'a e
lau 'a Senesi 25:28, "Pea pele'aki 'e 'Aisake 'a 'Isoa, koe'uhi ko 'ene
kai kiki mei he'ene tulimanu"! Pea ta he toki to ma'ulalo ia 'a e
peteliake. He taumaia na'e puli 'iate ia 'a e ta'efe'unga 'o 'Isoa ke ne
ma'u 'a e tapuaki faka-'Otua he te ne hanga 'e ia 'o va'inga'aki (25:34).
Ka 'i he kikivi pe 'a 'Aisake, kuo hoko 'a e 'aho ni, kuo hange kuo fa'ufa'u
malumu 'a hono ki'i famili ke kakaa'i ia. Pea ko e toki me'a fakaloloma
ia 'i ha ki'i famili na'e "fili'i" 'e he 'Otua ke vaka mai ai 'a 'Ene
Fakamo'ui ki mamani, ka kuo 'ikai ke nau tu'u fakataha ka kuo nau taki taha
ma'ana.
'Io ko e fakatokanga ia ki he kau taki, ke tokanga'i 'enau taki ke fai 'a e me'a 'oku finangalo ki ai 'a e 'Otua 'o 'oua 'e taki taha fili hono manako 'o iku 'o filifilimanako pea 'e 'uli leva 'a e ngaue. Pea 'i he hala leva 'a e taki, 'e "angatu'u" 'a e kau muimui. He 'oku mo'oni pe foki 'a e lau 'a e Tohitapu ia, "'i he 'ikai ha tu'i 'Isileli; na'e taki taha fai hono loto" (Fkm.17:6). 'I hono fakalea 'e taha 'i he 'ikai ke 'i ai ha taki, ha taki totonu mo ma'a pea faka-'Otua, 'e taki taha fai 'a e tangat aki hono loto. Ko ia 'a e me'a kuo hoko 'i he famili 'o Sekope 'i he 'aho ni. Fai 'e ia 'a e tu'utu'uni 'e taha, fai 'e hono tokoni 'a e tu'utu'uni ia 'e taha ke fakafepaki'i 'aki 'a e 'uluaki tu'utu'uni. Pea ko e toki tu'unga kovi mo'oni ia, he 'oku 'ikai ke fakangofua 'e he Tohitapu 'a e "angatu'u" pe ko e fakafepaki'i 'a e tu'unga taki. Ko e angahala lahi ia 'i he lau 'a e Folofola. Kae mahino foki na'e fakangofua pe foki 'eni ia 'e he 'Otua koe'uhi ko e 'ikai ke fai mo 'a hake 'a 'Aisake kae mo'unofoa ia 'i he "me'akai" 'a 'Isoa. Ko e me'a leva 'e hoko 'e fakangofua leva 'e he 'Otua ke le'ei holo 'a 'ene fekau 'o ne toe loto mamahi ai. Pea 'oku totonu ai pe foki ke mahino 'oku 'ikai ko 'ete tu'u 'i he tu'unga taki koe'uhi ke fai hoto loto. Mole ke mama'o! Ko 'ete 'i ai 'o fakaongoongo ki he 'Otua pe ko e ha Hono finangalo, pea ko ia 'e fai. Ka 'ikai ko e ngalivale lahi 'e fai.
'Oku 'ikai ke pehe ia kuo
tonu leva 'a Lepeka ia 'i he me'a na'a ne fai. 'Oku 'ikai
faka'uli'ulilatai 'a e mahino 'oku tu'u 'a Lepeka 'i he tafa'aki 'a e 'Otua 'o
mateaki'i 'a Hono finangalo. 'A e totonu ke mo'ulaloa 'a 'Isoa kia Sekope
'o hange ko e Folofola. Fu'u mahino 'aupito 'a e mo'ui faka-'Otua ia 'a
Sekope, kae'uma'a 'a 'ene mahu'inga'ia 'i he ngaahi tapuaki mo e foaki 'a e
'Eiki. Ka neongo ia kotoa 'oku tau tui na'e 'ikai ke totonu 'a e ala 'a
Lepeka ke ne fai 'a e me'a 'a e 'Otua. Neongo kuo mahino ko e finangalo
'o e 'Otua ko Sekope 'o 'ikai ko 'Isoa, kae tuku pe 'a e me'a 'a e 'Otua ia ki
he 'Otua, 'o 'oua te te kaunoa kita he te te loi pea te kakaa, 'uma'a foki 'a e
"angatu'u" ki hono 'ulu. He ko hai te ne 'ilo ha me'a ne mei
fai 'e he 'Otua. Mahalo na'e mei tamate'i 'e he 'Eiki 'a 'Isoa, pe te Ne
'ai ke 'oua te ne ma'u ha'ane manu, pe 'e fakaene atu pe ke fai 'e 'Aisake ha
tapuaki 'o 'Isoa ia kuo hoko hangatonu mai ha fekau ia mei Langi! 'Oku
miliona 'a e founga na'e mei fai 'e he 'Otua. Ka kuo si'isi'i 'a e tui ia
'a Lepeka 'o ne 'oho 'e ia 'o fai a' e me'a hala pea na'e 'asili ai pe 'a e
taki taha ma'ana 'a e ki'i famili he na'e 'alu ai 'a Sekope 'o lau lau ta'u
'ene mavahe mei hono ta'okete pea na'e lahi foki 'a e fehi'a mo 'ita 'o e loto
'o 'Isoa ki hono tehina. Pea ko e fakatokanga lahi ia kiate koe mo
au. Tau matu'aki nofo ki he 'Eiki 'i he 'aho kotoa pe koe'uhi ka hoko mai
ha faingata'a pe palopalema pea ke Ne vete'aki 'a 'Ene founga. 'Oku
fakatau'ataina ia, melino pea nonga.
No comments:
Post a Comment