NA'E FAKAHA KIA LEPEKA
Senesi 27:42; 'Aisea 54:17; 'Efeso 2:14-15
Kuo fakahoko 'eni 'a e lau 'a 'Isoa kia Lepeka pea
kuo fakavave leva 'e Lepeka 'a e ui 'o Sekope ke fakaha ki ai 'a e malumu 'a
hono ta'okete kiate ia. Ha toki 'api faka'ofa mo'oi ia 'a e 'api 'oku
'ikai ke fotu kakato ai 'a e mo'ui tau'ataina, ka ko e fakalolongo pe mo e
tatali ki ha fa'ahinga me'a 'e hoko mai. Pea 'oku 'i ai 'a e fu'u
'etimosifia ta'efefalala'aki 'i he fo'i loto'i famili. 'Osiange 'a e fo'i
me'a hange kuo nau lavelavea kotoa.
Pea 'oku tau lava leva ke tau sio ki he mahu'inga
'a e pau ke tuku kakato 'a 'ete mo'ui kia Sisu Kalaisi ke Ne hanga 'o
tataki. Ke Ne matu'aki hinoi'i kita 'i he me'a totonu ke fai. Pea
ke te falala kakato kiate Ia. 'I he 'osi 'o e fo'i fa'ufa'u fakaetangata
na'e fai 'e Lepeka mo Sekope, na'e hange ne toe tupu ai ha ngaahi faingata'a
lahi ia ki eh 'enau ki'i nofo fakafamili. 'Ikai kei hange hono fakalata
ko e 'uluaki taimi, mahino foki 'eni na'e tokolahi 'a e kau kaunanga mo ekau sevaniti
'a e famili, pea ne nau nga'uta kotoa pe 'i he me'a na'e hoko. Mahino pe
ne nau fakafa'afa'ahi. 'I ai foki mo e kau "sipai" 'a e ongo
tafa'aki, he 'oku talamai na'e "fakaha kia Lepeka 'a e ngaahi lea 'a 'ene
tama lahi ko 'Isoa". 'A ia 'oku mahino ai ko e 'omi 'e he kau sipai
mo e kau 'ave talanoa 'i he loto 'api.
Faka'ulia ia ko e 'api 'o e tangata 'a e 'Otua 'i
he fu'u to lalo pehe hono 'etimosifia. Ko 'eni kuo 'asi 'a e me'a
fakatu'utamaki ko ia ko e "fakahoko lau" 'i he fo'i loto
famili. 'Oku sai pe 'a e fakahoko lau, 'isa 'oku 'ikai ke sai pe, ka 'oku
huohua ange ke tau fanongo 'oku fai pe 'o felave'i mo e kolo, kulupu, kautaha,
ngaue'anga, mo e fonua, kae'oua pe na'a 'asi ia 'i he loto famili!
Vakaiange, nau nofo pe 'i he 'api 'e taha ka ko 'eni 'oku fakahoko 'a e lau 'a
e tama 'e taha ki he tama 'e taha, 'a e ongo tama na'a na takoto 'i he kete pe
'e taha. Pea 'ikai ko ia pe ka ko e toe ongo mahanga foki! Na'e
pipiki pe 'a e taha ki he taha. Pea toe koviange kuo mahino 'a e kau 'a e
matu'a 'i he palopalema. Ko Lepeka 'eni kuo 'ikai ke ifo ha'ane
nofo. 'Oku ne manavasi'i ma'u pe telia ha me'a 'e hoko. 'Ohovale
pe, kuo "fakahoko" ange 'a e me'a na'a ne nofo ilifia ki ai.
'Ikai 'oku toki sio 'a Lepeka ki he 'ikai te ne
ki'i talisi'i hifo 'o 'oange ki he 'Otua pe ko e ha 'e fai. Ka ne tu'u
atu pe 'e ia 'o fai 'a e fo'i fa'ufa'u, pea neongo kuo fakahoko ai pe 'a e
finangalo 'o e 'Otua ka kuopau pe ke 'i ai hano "nunu'a 'i he pule'anga 'o
Sisu". 'Ikai 'oku mahino heni 'oku 'i ai 'a e me'a ko e kaveinga 'a
e 'Otua, pea toe 'i ai mo e me'a ko e founga 'a e 'Otua. 'E 'ikai ke
malava ke fai ha founga 'a ha tangata ke ma'u 'aki 'a e me'a faka-'Otua.
Pea 'oku mo'oni 'a e lea 'oku taka, 'e 'ikai ke lava 'e he taumu'a neongo 'a
'ene faka'ofo'ofa fefe, ke fakatonuhia'i 'a e founga. 'Ilo'i ia 'e Lepeka
'i he 'aho ni. Ko e me'a kovi 'a e faikovi pe fa'ufa'u founga kovi pe
hala, he ko e fua ko 'eni 'e feta'aki 'a 'ene ongo mahanga. 'A e ongo
tama pe ko ia 'e ua 'a hono manava. Pea ko e 'uhinga ia 'o e fo'i lea 'o
'etau kaveinga, "pea na'e fakaha kia Lepeka". Fakaha ki ai he
ko ia na'a ne kamata 'a e me'a! Pea fakaha ki ai he na'e 'ikai ke mei
tupu 'a e vakovi ko ia. 'Io, pea toe fakaha foki ki ai ko e me'a na'e
hoko kuo tupu ai 'a e fakafa'afa'ahi, sipai mo e lolongo 'i he loto
famili. 'Ikai ko ia pe kae FAKAHA foki ki ai ko Sekope, 'a 'ene tama
pele, 'a ee 'oku tupu ai 'a 'ene hee, 'e fakapoongi.
Pea 'oku talamai 'e 'Isoa 'e toki fakalelu pe hono
loto 'o ka fakapoongi. Pea ko e anga ia 'o e mo'ui tu'u 'i he
kakano. 'Ikai pe ke nonga kae 'oua pe ke fai ha kovi ki hono fili.
'E toki lelu pe hono loto 'o ka toki lau atu. Ka 'ikai ke ne taa'i pea 'e
'ikai pe ke teitei lelu 'ene fakakaukau. Ko honau lelu'anga ko e kovi pe.
Faikehekehe ia mo e tangata 'i he Laumalie, ko hono fakalelu'anga 'oku taha pe
ko e Kolosi 'o Kalaisi, 'a e kolosi, "'a ia kuo kalusefai ai 'a mamani
kiate au, mo au ki mamani" (Kal.6:14). Fetamate'i'aki. Pea
'oku 'ikai ha toe feinga fakalelu loto. Kaekehe ke toe fakaha pe mo ia
kia Lepeka ke tala kia 'Isoa kuo 'osi fai 'a e fakapoongi ia, na'e fai ia 'i he
Kolosi, pea ke tau fai'aki pe ia!
No comments:
Post a Comment