KUO TOE FA'UFA'U PALANI 'A LEPEKA!
Senesi 27:43-45; 24:29; 33:1,4,9;
Palovepi 3:5-7; Saame 37:5.
'Oku mahino ko Lepeka ko ha fefine 'atamai
lahi. Ko e hoko pe ha me'a, kuo vave leva hono ki'i 'atamai, ke fika'i pe
ko e ha 'e fai. pea 'oku tau tui ko e taha ia ha vaivai'anga 'i he mo'ui
'a Lepeka, fu'u lahi 'ene falala ki hono 'atamai. 'Oku ne feinga ma'u pe
ke veteki 'a e ngaahi fihi fakafamili 'e ia pe. Na'e 'ikai pe ke ako 'a
Lepeka ia 'i he me'a na'e hoko. Kuo 'ikai te ne sio ki he fe'ite'itani mo
e fakafa'afa'ahi 'oku hoko 'i he loto famili, 'oku fainoa pe. Pea ko 'eni
'a 'ete vete'anga ki he teu fakapoongi 'e 'Isoa 'a Sekope, ko e fekau ke
hola. Na'e toe fasi ai pe foki mo hono loto, ko e 'amanaki mavae mo 'ene
tama pele 'ofa'anga. Pea 'ikai ko ia pe ka ko e fesiofaki faka'osi pe ia
he na 'e fekau ke 'alu 'i ha ngaahi "'aho si'i", kae'oua 'e lolou 'a
e 'ita 'a 'Isoa. Ka na'e hoko 'ae ngaahi 'aho si'i ko ia ko e ta'u 'e
uofulu tupu. Na'e 'ikai pe te ne toe mamafa kia Sekope 'o a'u ai pe ki
he'ene mate. 'A ia 'oku mahino, ko 'ene ngaahi fa'ufa'u, na'a ne toe
mo'ui faingata'a'ia mo mamani ai pe.
Ka neongo ia na'e ngaue'aki pe 'e he 'Otua 'a e
ngaahi fa'ufa'u na'a ne fai. He 'oku fa'a pehe pe 'a e Ta'ehamai, ko e ha
'a hotau ngata'anga, 'oku Ne toki kamata ma'u ai pe ke fakamo'oni pe ki he lau
'a e 'Ipiseli, "'ilonga 'a e kakai 'oku ofa ki he 'Otua, 'oku fengaue'aki
'a e me'a kotoa pe ma'anau lelei; he ko e kakai kinautolu kuo ului 'o fakatatau
ki He'ene tu'utu'uni" (Loma 8:28). Ko e konga lahi 'a e ngaahi me'a
na'e sio ki ai 'a Lepeka, na'e hoko kotoa pe. Na'e fai atu pe kuo 'osi 'a
e 'ita 'a 'Isoa kae langa 'ene 'ofa ki hono tehina (33:1,4,9). Na'e ngalo
kotoa 'a e fu'u fe'ite'itani ko 'eni. Ka na'e 'ikai pe foki ke ne toe
mamata ki he fofonga 'o Sekope 'o hange ko 'ene lau, "pea te u toki fekau
atu 'o 'omi koe mei ai". Na'e 'ikai pe ke toe lava ke fekau'i 'a
Sekope ia ke ha'u he na'a ne 'efihia 'e ia ai ki he polokalama 'a e 'Otua.
Ko e lave ki he "fakatou mole" (v.45), ko
e sio ia ka lava hono fakapoongi 'e 'Isoa 'a Sekope pea kuopau ke fai 'e he
kainga ofi taha 'o Sekope ia ha sauni 'o Sekope 'aki ha feinga ke fakapoongi mo
'Isoa foki. Pea te na fakatou mole meia Lepeka. 'A ia ko e taha ia
ha konga faingata'a kia Lepeka 'o e 'u fa'ufa'u kuo ne fai. He neongo ai
pe na'e lava hona fakatou fakamo'ui, ka na'e lava ia 'i he fu'u totongi
lahi. Na'e movete 'a 'enau nofo 'o nau fepulingaki 'i ha ngaahi ta'u
lahi. Pea na'e 'ikai ha taha 'e lavea lahi 'i he ngaahi fa'ufa'u kuo fai
ka ko Lepeka pe.
'Io, 'oku pehe 'a e fakatokanga 'a e 'Otua kiate
koe mo au 'i he pongipongi ni. Manatu'i ko Lepeka ko e fefine na'e lotu,
he na'a ne mamahi'i 'a e 'Otua pea mo e fai 'a e me'a 'oku Ne finangalo ki
ai. Ka na'a ne feinga pe 'e ia 'iate ia pe ke ne fai hono
fakakaukaua. Pea na'a ne toki inu pe 'a e kona 'o 'ene ngaue. Ko ia
ko e tokotaha 'oku ne tali 'a Sisu, 'oku ne foaki 'a 'ene mo'ui kotoa ke
fakalele mo fakakaukaua 'e he 'Otua. Taumaia ke tau tukuange ki he 'Eiki ke Ne
palani 'a 'etau mo'ui he 'oku Ne 'afio'i 'e Ia 'a e kaha'u. Ko Ia
tokotaha pe 'oku pule, pea ko ia tokotaha pe 'oku Ne fokotu'utu'u 'a e
hisitolia mo e mo'ui 'a e tangata. Pea 'oku mo'oni pe 'a e Saame ko e
ngaahi sitepu 'a e tokotaha ma'oni'oni 'oku fokotu'utu'u ia 'e he 'Eiki (Same
37:23). Pea 'oku toe fakatokanga mai foki mo e Poto, ke "Falala ki
he 'Eiki 'aki 'a e kotoa 'o ho loto, 'o 'oua 'e faaki ki ho poto 'o'ou"
(Palov.3:5). Ke tokoni'i kitaua 'e he Laumalie 'o e 'Otua 'i he 'aho ni
ke Ne fai 'e Ia 'a e fokotu'utu'u 'o e polokalama 'o e 'aho ni. Ko e
fiha'i palani 'eni 'eta fai mo 'ene tu'u fehalaaki pea mo 'eta kai
mamahi. Tukuange kiate Ia ke Ne hu mai 'o 'Atamai pea Ne fekau'i
kitautolu ki he 'aho ni pea ko ha toki 'aho 'eni 'e maau, melino, fiefia pea
fakanonga.
No comments:
Post a Comment