Oku Fili Fa'iteliha Pe 'a e Otua Ia

PEA PO'ULI HONO FOFONGA

Senesi 27:1-4; 48:10; 1 Samiuela 3:2; Matui. 6:22.

'Oku fu'u faingata'a 'aupito ke tau mahino'i 'a e 'uhinga na'e kavekave a'u ai pe 'e 'Aisake 'a 'ene fakakaukau ke tapuaki'i ai pe 'a hono 'uluaki foha, 'a 'Isoa, kae 'ikai ke 'oange kia Sekope 'o hange ko e tu'utu'uni 'a e 'Otua (25:23).  'Ikai ko ia pe ka kuo fu'u mahino mai pe ia 'i he anga 'o e tu'u 'a e ongo mahanga, 'oku mavahe 'aupito 'a  Sekope ia 'ia 'Isoa.  Angamaopo ange 'a Sekope mo fakapotopoto, pea ne toe mahu'inga'ia 'i he ngaahi me'a faka-'Otua kae'uma'a 'a e ngaahi me'a faka-famili. 

Ka ko 'Isoa ia, fu'u tokanga pe ia ki he'ene tulimanu, pea 'atamai noa 'o ta'emahu'inga'ia 'i he 'u koloa kuo tuku mai 'e he 'Otua.  Ko e sipinga pe 'a e foaki mola kia Sekope 'a e tu'unga hoko koe'uhi ko e me'i sepo kula!  (25:31,32)  Pea 'ikai ko ia pe kae toe tu'u hake pe 'a 'Isoa ia 'o mali mo e ongo fefine Kenani (Heti), 'a e me'a na'e tapui'i mamafa 'e 'Epalahame (24:3).  Pea na'e 'ilo pe 'e 'Aisake 'a 'ena kai mamahi mo Lepeka 'i he ongo uaifi ko ia 'o 'Isoa.  Ko 'eni kuo loto pe 'a 'Aisake ia ke kei taupaki'i pe 'a 'Isoa ia!  'Ikai ke ngata ai he 'oku totonu pe ke 'ilo'i 'e 'Aisake 'e 'ikai ke 'alu 'a e tapuaki faka-'Otua ki ha hako 'o ha kau Kenani, he ko e kakai ia kuopau ke faka'auha.

Ko e ha nai na'e fai pehe ai 'a 'Aisake? 'Oku talamai pe 'e he Folofola ia, na'e 'ofa 'aupito pe 'a 'Aisake ia 'ia 'Isoa "koe'uhi ko 'ene kai kiki mei he'ene tulimanu"  (25:28)!  Pea kapau ko e mo'oni ia, pea ko e toki me'a faka'ulia ia ko e vaivai 'a 'Aisake, 'a e fu'u tangata lahi mo fakalaumalie 'a e 'Otua, kuo mo'ulaloa ki he ki'i konga me'akai!  Pea kuo ne tukuange 'a hono kakano ke ne le'ei 'a e fokotu'utu'u 'a e 'Otua ko Sekope 'e 'ulu. Kaekehe ka ko e toe ha pe ha'atau fa'ahinga fakatonulea mahalo pe na'a 'ikai ke tau mahino'i kakato ka ko e me'a pe 'eni kuo hoko, kuo ui 'e 'Aisake 'a 'Isoa 'o fakaha ki ai te ne 'oange mo'ona 'a e tapuaki.

Ko e me'a maheni pe ia 'o e kuonga mu'a 'a e pau ke fai 'a e ngaohi me'akai 'i he 'aho 'e fai ai ha tuku tapuaki, 'a ia ko e me'a ko 'eni na'e fekau 'e 'Aisake ke fai ke ngaohi ha'ane "lo'imanu" ko e me'a totonu pe ia.  Pea 'i he tafa'aki ko ia 'o e tuku tapuaki, ko me'a ia na'e fu'u mahu'inga 'i hono 'aho.  Ko e lea faka'osi hange nai ha tala tuku 'a e tamai ki he 'ene fanau kae tautautefito pe ki he foha lahi.  Pea ko e 'aho ia 'oku fakana'una'u ki ai 'a e ngaahi foha lahi.  Pea na'e pehe pe mo 'Isoa.  Ko hono faikehekehe pe, 'i he ngaahi tuku tapuaki kehe na'e 'eva noa'ia pe 'akinautolu 'e tuku honau tapuaki, kae toki ha'u pe ke ma'u. Ko e tukunga ia 'o e kakano, pea 'e loto mamahi 'a 'Isoa 'i ha'ane ha'u kuo 'ikai 'oange ma'ana.  He ko e tapuaki 'a e 'Otua kuopau 'e 'ikai laku tavale pe ki he pelepela na'a tamoloki'i mo 'uli'i he ko e ngaahi siueli mo'onia.  'Aia foki 'oku tau ako mei ai neongo pe 'oku 'iai ha palomesi 'a e 'Otua ma'ata 'ilonga pe 'a 'ete mahu'inga'ia ai 'i ha'ate fakamahu'inga'i kita mo 'et emo'ui 'o 'oua 'e 'ai ke palahi noa'ia ai 'a mamani.

'I he'etau toutou lau 'a e ngaahi fo'i veesi ko 'eni 'e fa 'i he 'aho ni te tau fakatokanga'i, 'i he'etau faka'ata 'a e Laumalie Ma'oni'oni ke Ne hanga 'o hulu'i mo fakamaama, 'a e ta'e totonu pe ke fai 'e 'Aisake ia 'a eme'a ni .  'Oku mahino pe ia na'e mahino 'aupito pe ki ai 'e 'ikai ma'u 'e 'Isoa 'a e tapuaki, kae mahalo pe na'e ngalo ia ko e hulu 'a e'oange lo'imanu ma'ana 'e 'Isoa!  Pea fu'u 'ofa ai 'o puli meiate ia 'a e fekau 'a e Ta'ehamai.

 'Oku tau tui 'oku 'omi pe 'e he ngaahi fo'i lea 'a e kaveinga 'o e pongipongi ni, "pea po'uli hono fofonga".  Na'a ne lava pe ke fekau'i 'a 'Isoa he kuo ne kui.  Pea ko 'ene kui, ko e fakapuliki 'e he kakano!  He 'oku te'eki ke vaevaeua ke pekia, 'o hange ko 'ene lea, "'oku 'ikai te u 'ilo pe te u pekia fakaku".  'Oku mahino 'i he taimi ko 'eni na'a ne lea ai kia 'Isoa kuo ne ta'u teau ma tolungofulu tupu lahi.  Ka te ne toki pekia ia 'i he hoko hono ta'u teau valungofulu (Sen. 35:28).  'A ia ko 'ene lea 'a'ana ko 'eni kia 'Isoa ke 'omi ha'ane me'akai kae tapuaki'i ia telia na'a ne pekia, 'oku kei toe 'a e ta'u ia 'e nimangofulu pea toki mate!  Ka kuo kuihi ia 'e hono loto.  'Oku toki 'asi 'i he konga kimui 'o e veesi 4, "pea ke 'omi kiate au ke u kai: hei'ilo 'e lava ai 'a hoku loto ke fai ho tapuaki'i 'i he te'eki ke u mate"!  Ke lava hoku LOTO! Me'a faka'ulia ia ko 'ete ofi ki he 'Otua kae kei malava ke tolotui mai pe 'a e fie fai ki hoto loto.

Pea 'oku 'ikai ke faikehekehe 'a e 'uhinga 'a 'Aisake heni mo e me'a na'e fai 'e he ongo 'ofefine 'o Lote kiate ia (19:31-35).  Na fakainu uaine'i ia 'o kona 'o nau mohe 'o 'ikai te ne 'ilo 'a 'ene "tokoto mai mo e tu'u atu".  Kuo kui 'a e tangata'eiki ia.  Kuo po'uli hono fofonga.  Pea ko e "fofonga" heni ko e tama'imata ia 'o hoto laumalie.  Ka lava 'o fakakuihi te te toki lava leva ke fai tau'ataina 'a e me'a 'oku te loto ki ai. Toe tokanga'i ange pe 'a e lea 'a 'Aisake 'a e 'oku na fehokotaki ai mo Lote, "pea ke 'omi kiate au ke u kai (uaine'ia): hei'ilo 'e lava ai" ke kui kae fai 'a hono loto - ke tapuaki'i 'a 'Isoa, 'a e tokotaha 'oku 'ikai teitei finangalo ki ai 'a Sihova.  Fakafeta'i pe ko e 'ofa 'a e 'Otua ke 'oua te Ne fakatokanga'i 'a e vale 'a 'Aisake, pea pehe foki mo kitautolu 'i he taimi lahi.

Pea ko ha ako mahu'inga ia ke te 'ilo'i neongo pe ha'ate mo'ui fakalaumalie 'o tau ki fe 'e kei tolotui pe hotau loto kakano 'o faifai pea tau fai 'a e ngaahi me'a ko ia 'oku tau kovi ki he 'Eiki.  Ke 'oua pe na'a tau fakamohemohe telia na'a 'ohovale pe kuo tupu 'a e "kakano" 'o fakapo'uli'i hotau fofonga pea tau fai ha me'a 'oku ta'ehoa mo e 'Otua.

Akonaki: Oku Fili Fa'iteliha pe 'a e Otua ia