KAKA FANONGO PE 'A LEPEKA
Senesi 27:5; Saame 139:4&5;
Luke 12:3.
'Oku ngali kehe 'a e 'ikai ke hanga 'e 'Aisake 'o
fakaha kia Lepeka, hono uaifi, 'a e me'a lahi 'oku ne teu ke fai. 'I he
anga 'o 'etau sio ko e husepaniti mo e uaifi, tautautefito kapau 'oku na lotu,
'oku totonu ke na fekau'aki mo femahino'aki 'i he ngaahi me'a kotoa pe 'oku teu
ke fai 'i hono 'api. Pea tautautefito ki ha me'a felave'i mo e
fanau. 'A e alea'i honau kaha'u mo 'enau ngaahi 'inasi fakafamili.
Ka 'oku mahino foki 'oku 'ilo'i pe 'e 'Aisake 'oku 'ikai ko e finangalo 'eni 'o
e 'Otua 'oku ne fai. Pea mahalo pe foki 'oku ne 'ilo'i 'oku 'ilo ia 'e
Lepeka, he ko Lepeka na'e fakaha 'e he 'Otua ki ai, kuopau ke sevaniti 'a e
lahi ki he si'i (25:23).
'Oku tau tui pe foki na'e kamata pe ke mahino'i 'e
Lepeka ia 'a e tokanga pe 'a e tangata'eiki ia kia 'Isoa. Pea 'oku tau
tui pe na'e lotomamahi 'a Lepeka 'i he ta'etokanga 'a 'Aisake ke fai 'a e
finangalo 'o e 'Otua. Ko ia 'i he pongipongi ni 'oku tu'u 'a Lepeka 'o
fakafofonga'i 'a e 'Otua. Pea 'oku te sio foki ki ai 'a e 'ikai pe ke
honge tangata 'a e 'Otua. Ko e peteliake 'eni kuo he, pea 'oku totonu ke tau
toe tokagna ange ai, ka kuohoko mai 'a Lepeka ia ke fai 'a e faka'uli 'o e
famili ke 'alu pe 'a e me'a na'e 'uluaki tukufua ki ai. Pea ko e ako ia
kiate kitautolu kau taki lotu mo e kau taki fonua mo famili ke tau matu'aki
'a'a na'a "po'uli hotau fofonga" kae 'auha hotau kuonga.
'I he fai ko ia 'e 'Aisake 'a 'ene talanoa fakafufu
kia 'Isoa ke teu ke tapuaki'i, "ka ka fanongo pe 'a Lepeka".
Hange ko 'etau lau 'anenai, kuo tu'u heni 'a Lepeka 'o fakafofonga'i 'a e
'Otua. Na'e pehe 'e 'Aisake ia na'e 'ikai ke 'ilo 'e ha taha ia 'a e me'a
'oku ne fai. 'Amanaki 'e ia 'oku kui 'a e 'Otua 'o hange ko ia, 'o 'ikai
te Ne 'afio'i ha me'a. 'Ikai te ne teitei misi 'oku fai 'ene lea
fakapulipuli ka 'oku fanongo pe 'a e 'Eiki. He 'oku 'afio 'a e 'Eiki 'i
he potu kotoa pe. Pea ko e toki kui ia ka lahi 'a e kui ta'e'ilo'i 'a e
'afio 'a e 'Otua 'i hoto 'atakai. 'Oku tu'u foki 'a 'Aisake heni 'e
fakafofonga'i kitautolu kotoa 'a e fa'ahinga 'o e tangata. Ko 'etau
faifainoa mo 'etau finangalo haohaoa 'o e 'Otua, kae taumaia ke tau manatu'i 'a
e lau 'a e Saame, "ko 'eku nofo hifo mo tu'uhake 'oku ke 'ilo pe"
139:2. Na'e pehe foki 'e Pelame ia 'oku 'ikai ke 'ilo 'e he fepaki mo e
kau Moape (Nom. 22:22-34). 'Ohovale ia 'i he ta'ofi fakaoloolo hake pe 'o
'alu ta'e'ilo 'e he 'Otua. Ko Siona, fekau ke 'alu ki Ninive, hola ia ki
Tasusi. Pea to ki he kete 'o e ika, uoke ko e 'Eiki 'ena 'oku 'i
hena! Pea 'oku kei mo'oni pe 'a e Saame, "Te u hola ki fe mei Ho
fofonga?" (139:7). He 'oku tatau pe 'a e 'aho ia mo e po'uli
ki he 'Eiki, pea 'ikai foki ha faikehekehe 'a fale mo tu'afale kiate Ia.
Ko ia ke tau 'a'apa ki hotau 'atakai 'o mahino'i
'oku fanongo pe mei ai 'a e 'Eiki, ki ha'ate lea, ngaue, pe to'onga
mo'ui. 'O 'oua na'a te fai 'a eme'a palaku ko ia ko e 'Ao. Ko e
me'a 'oku mata'a'a ai he 'oku fai kotoa pe 'i He'ene 'Afio. Pea 'oku
'ikai ha loi pulipulia ia (secrets). Ko e me'a kotoa pe 'oku
"fukefuke" 'i Hono 'Ao. He 'oku telefua 'a Mamani kiate
Ia. 'Ofa ke tau ma'uloto ia 'o tapu ke tau toe fai ha me'a 'i he
ngutungutuua pe feinga ke fakapulipuli mei he 'Eiki, 'a e me'a na'e fai 'e 'Aisake
'i he 'aho ni, "lolotonga 'a e fai 'e 'Aisake 'ene me'a ki hono foha ko
'Isoa" ka ka fanongo pe 'a e 'Otua!
Akonaki: 'Oku 'Afio 'a e 'Otua 'i he potu kotoa
pe.
No comments:
Post a Comment