PEA TOE TAPUAKI'I 'E 'AISAKE 'A SEKOPE
Senesi 28:1-4; 24:3,4; 25:20; 17:1,6; 12:2;
17:8.
'I he 'aho ni kuo hange ka matafi hake ha 'aho
fo'ou. Kuo ui 'e 'Aisake 'a Sekope ke fai hono tapuaki'i. Pea 'oku
tau malie'ia 'i he peteliake, mahino pe na'e ki'i tu'u 'i he fehalaaki 'o 'ene
taki pea mo e kakaa'i ia 'e hono famili. Ka 'i he faifai pea tapua mai 'a
e Maama faka-'Otua na'a ne maamangia ai pea kuo ne fakangalo'i 'a e me'a kotoa,
ka kuo ne ma'u kakato 'a e nonga. Maama hono mata pea ne hanga kehe leva
meia 'Isoa he kuo ne 'ilo'i kuo 'ikai ke fili ia 'e he 'Otua. Pea 'oku
tau tangane'ia ai. Ka 'i ai leva ha me'a 'oku tau loto ke fai, pea ka ha
leva 'a e finangalo 'o e 'Otua pea 'oku totonu leva ke ta'ofi 'a e me'a
kotoa. Tuku hoto loto, kae fai leva 'a e finangalo 'o 'Ene 'Afio.
Pea to lelei leva 'a Sekope kia 'Aisake. Kuo
ui mai 'e 'Aisake 'o ne tapuaki'i. Ko e kamata ia ke tafe totonu 'a e
hala fakatukufakaholo 'o e mo'ui. Ko 'Epalahame, 'Aisake pea
Sekope. Ko 'ene totonu ia. Pea 'oku tau malie'ia foki 'ia 'Aisake
'i he'ene tapuaki'i 'a Sekope, hili ia na'e fakafoa 'a 'Isoa mo toutou kole pe
me'a ni 'oku 'ikai pe ha ki'i tapuaki 'e toe ke 'oange mo'ona
(27:34,36,38). Ka na'e 'ikai ke toe ha tapuaki mo'ona! Ka ko 'eni
kuo toe tu'o ua hake pe hono toe tapuaki'i 'o Sekope. Ka kuo ha 'a e 'osi
ia 'o e tapuaki? Kuo 'osi 'aupito pe 'a e tapuaki ia ki he kakai kuo nau
'ofa pe kinautolu 'i he po'uli, ko i a'oku 'ia Sisu 'oku mapunopuna ma'u pe 'a
e vai ia 'o a'u ki he mo'ui ta'engata (Sione 4:14). Pea 'oku mo'oni 'a e
lau kia Sisu 'a 'ene fonu, "'O taufetongi he kelesi mo ha kelesi"
(Sione 1:16). Pea 'i he'ene pehe, ta ko e fielau 'a e toe pe 'a e tapuaki
ia mo'o Sekope.
Ka ko e tapuaki foki 'oku ha'u fakataha mo ia ha
fu'u fatongia ke fai. Ko ia 'i he tapuaki'i 'e 'Aisake 'a Sekope, na'a ne
tu'utu'uni fakataha ai pe kiate ia ke tapu ke mali mo ha fefine Kenani.
Ko ha fekau mo'oni ia. Ka kuo tapuaki'i kita 'e he 'Otua kuo pau ke 'alu
fakataha leva mo e totonu ke ma'oni'oni mo tapuha 'a 'ete mo'ui. 'E 'ikai
te te toe mo'ui noa'ia he ko e koloa kanokato kita 'a e 'Otua. Pea telia
na'a mele 'a Hono finangalo 'i ha'ate ngaue ta'etokanga ki he'ete mo'ui.
Hange pe ia ko 'ete tali 'a Sisuu, pea 'oku fale leva 'a e Laumalie 'o e 'Otua
'iate kita pea kuo tapuha leva mo hoto sino - ko e temipale ia 'o e 'Otua, pea
ke 'oua na'a toe fihi fakataha ia mo e ngaahi temipale 'aitoli 'o Kenani!
'Oku ngali matangata'a nai 'a e tu'utu'uni ka ko e
matangata'a pe ia 'i he tangata 'oku ne kei 'i he kakano. Ka ke tau manatu'i
ko e tapuaki mo e kelesi na'e 'oange kia Sekope, na'e tupu ai 'a e mo'ui ia 'a
Sekope 'o fu'u ma'olunga. Pea 'i he'ene fu'u ma'olunga, na'e 'ikai ke a'u
hake ki ai ha fefine Kenani ia. Na'e kehe ia meia 'Isoa, ko 'Isoa ia na'e
taulalo pe 'a 'ene mo'ui 'ana. Na'e 'ikai toe hela kakapa ia!
'Asinga na'a nau to'u pe kinautolu ia. Ko e me'a kia Sekope kuo hiki ia
ki Hevani 'e he kelesi 'a e 'Otua (Kolose 3:4).
Pea kapau kuo te mo'ui 'i
He'ene kelesi mo Hono ivi pea ta 'oku 'ikai ha faingata'a ia 'i he fakahoko 'o
ha fekau 'e fai mai. 'Ikai ko ia pe, ka ko kita kuo te tali 'a Sisuu, ko
Sisu 'oku Ne fai 'a e fekau. Pea ko e taha foki ia ha 'ulungaanga malie
'o e 'Otua, ka 'oku teu ke Ne 'omai ha fekau kiate kita, kuo pau ke Ne tomu'a
'omi 'e Ia ha tapuaki mo ha ivi ke te ma'u, pea Ne toki tukuange mai 'a e fekau
ke ha'u. 'E 'ikai ke fai mai ha tu'utu'uni 'o ha me'a ke fai ta'e te Ne
'uluaki fakakaukaua kita 'i Hono Laumalie. Pea 'oku totonu foki ke 'oua
te te hanu 'i ha fekau 'oku ha'u 'oku fu'u mamafa pe fefeka. Hanu pe kita kiate
kita ko e 'ikai ke 'i ai ha'ate kelesi, pea ko e 'ikai ke 'omi hato tapuaki
koe'uhi pe kuo fakafefeka hoto loto 'o 'ikai ke te fakaava kia Sisu Kalaisi 'a
e Tokotaha 'oku Ne tukituki 'i he 'aho mo e po 'i he matapa 'o hota loto.
No comments:
Post a Comment