KE FAKAHOKO 'A E FINANGALO 'O E 'OTUA
Senesi 27:46; 26:34,35; Loma 8:28.
Ko e veesi 'o e 'aho ni, 'oku toe fakahoko atu ki
ai pea ko e fakakakato ia, 'o e ngaahi fa'ufa'u 'a Lepeka. 'Oku mahino
'aupito 'a e kovi 'a e ongo uaifi 'o 'Isoa. Pea kuo 'ilo'i pe foki 'e
'Isoa ko e konga 'e taha 'o e mole hono tapuaki k e 'ikai ke fakaongoongo 'a
'ene mali. Tu'u hake pe ia 'o mali mo e fefine Heti, ko e fefine Kenani
pea ko e kalasi fefine ia ko ia 'oku 'ikai pe ha'anau manako 'akinautolu ki he
'Otua. 'Oku nau fakalili'a kinautolu 'i he mo'ui fo'ou. Ko honau
mamana 'a e koloa mo e mo'ui fakausousa. Pe a'oku tau tui foki na'e toe
koviange 'a e anga 'o e ongo uaifi Kenani 'o 'Isoa, pea ko e 'u tapuaki 'e ma'u
ia 'e he'ena fanau. Mahino ne nau fa'a talanoa ta tu'o lahi ki ai mo
'Isoa. Ka 'i he 'ikai ke ma'u 'a e tapuaki, pea tautau tefito 'ena 'ilo'i
ko e founga kakaa na'e mole ai, na'e toe fakautuutu ange 'o e kovi hona anga ki
he ongo matu'a. Mahino ne na 'ai'ailea mai kinaua ki he'enau fa'ahinga
lotu 'oku fai.
"'Oku pehe ha lotu ke kakaa pea toe loi, tautau
tefito ki he lohiaki'i 'a e tamai!" "Pea 'oku pehe ha fa'ee
lotu ke filifilimanako pea pou'i 'a e kovi ke nofo fe'ite'itani 'a 'ene ongo
tama!" Pea mahino foki kuo toe 'a'asili ai pe 'a 'ena tui 'oku fu'u
kei fakalata ange pe 'enau to'onga mo'ui 'anautolu pea mo 'enau fa'ahinga
lotu. "Kapau 'oku fu'u pehe fau nai 'a e mo'ui fo'ou, ke
fetaukakaa'aki fakaloto'i famili, ta 'oku laka mama'o ange pe 'a 'ema mo'ui
motu'a 'amaua ia!", ko 'ena lau mai ia kia Lepeka. Pea 'i he
pongipongi ko 'eni, kuo ongo'i pe 'e Lepeka kuo 'ikai pe ke ne kei
malava. Kapau ko hono tufakanga pe 'eni ko e nono'o fakataha mo e kau
"mo'ui motu'a" 'i he toenga 'o 'ene mo'ui, ta kuo ifo 'anoa 'a e mate
ia. He ko e loi!
Ka ko e ongo finematu'a vale foki. He na'a na
sio 'anefe 'oku 'i ai ha tufakanga 'o e mo'ui hiteni 'i he me'a 'a e 'Otua
mo'ui. 'Oku 'ikai 'aupito ke teitei fekau'aki 'a e maama mo e
po'uli. Pea 'oku 'ikai ke me'a fakataha 'a Peliali mo Kalaisi. 'Uma'a
ha fetaulaki 'a e Laumalie mo e kakano. Kae mahino foki na'a na kau 'i he
fa'ahinga ko ia 'oku pehe, ke mo'ui fakakakano pe kae feinga pe ke ma'u ha
ngaahi tapuaki faka-Laumalie. Kaekehe ko e kovi ko ia hona 'ulungaanga
pea mo e ta'efekoekoe'i 'i he ngaahi me'a fakafamili, 'uma'a 'a e
ta'efepoupouaki 'i he ngaahi me'a fakalotu ko e me'a fakamamahi ia kia
Lepeka. Pea ko 'eni kuo ma'u 'e Lepeka ha me'a ke tu'unga ai 'a 'ene
fa'ufa'u ke fakaholaki 'a Sekope ki hono tuonga'ane, kia Lepani ki
Kalana. Matapoto 'a Lepeka, pea ko e masila pe foki ia 'a hono 'atamai,
kuo ne 'ai ai 'a e fo'i hanu felave'i mo e ongo finematu'a ke fakahoko ai leva
'a 'ene palani kia Sekope. 'Oku tau tumu ai 'i he fa'ahinga 'atamai na'e
'oange mo'o Lepeka. 'Atamai mohu. Ka ko e 'atamai fakatu'utamaki
pea 'e iku 'o fakafepaki ki he 'Otua 'okapau 'e 'ikai ke te tokanga.
Kaekehe hoko 'a e fa'ufa'u 'a Lepeka fakataha mo e
kovi 'a e 'ulungaanga 'o e ongo finematu'a ko e me'a ke fai ai 'a e finangalo
'o e 'Otua. He ko e finangalo foki 'o e 'Otua ke 'oua na'a teitei ma'u
uaifi 'a 'ene kau Sevaniti 'i Kenani kae foki pe ki Kalana ki he famili pe 'o
'Epalahame, pea ko honau toto foki pe, 'o mali ki ai (24:3,4). Pea 'oku
tau malie'ia 'i he founga fai 'a e 'Otua 'a 'Ene ngaue'aki pe 'a e ngaahi
vaivai'anga fakaetangata ke fakahoko ai pe hono finangalo. Na'e 'ikai
foki ko e tefito'i kaveinga ia 'o e lea 'a Lepeka. Ko e tefito'i taumu'a
ia 'a Lepeka ko e hola meia 'isoa, pea sio ange talaange 'e ia kia Sekope ke
'alu pe ki Kalana 'i ha ngaahi 'aho si'i" pea 'e toe foki mai.
Kae mahalo foki kuo 'ikai ha me'a 'e hu ai pea ne fakava'anga ai pe 'i he kovi
'a e 'ulungaanga 'o e ongo uaifi 'o 'Isoa. 'Oku taau ke tau fakatokanga'i
ai, 'a e taimi lahi, tautautefito kapau ko e tokotaha kita 'a Sisu, ko e ngaahi
fa'ufa'u mo e ngaahi fakakaukau lahi 'oku tau fai, neongo na'e fa'a fa'u
noa pe, ka 'oku fa'a fakahoko ma'u ai pe 'e Sisu ia Hono finangalo.
No comments:
Post a Comment