Koe taha 'o e ngaahi fakatata lahi 'o e 'ofa 'a e 'Otua ki he fa'ahinga 'oe tangata 'oku lava ke ma'u ia 'i he 'ULUNGAANGA FAKAMOHENGA ko ia 'oe tangata ('Oku 'uhinga fakalukufua ki he fa'ahinga 'oe tangata, tangata moe fefine). Koe foaki'ofa fakaofo mo'oni ia mei he 'Otua. Kae hange koe foaki 'ofa kotoa pe kuo foaki mai kiate kitautolu, 'oku 'ikai ha'u ma'ata'ataa pe ia. Ko hono toe fakalea 'e taha, 'oku 'ikai ko ha fa'ahinga me'a ia tetau lava pe 'o fai fakatatau mo hotau loto. Kuo 'osi fokotu'u 'ehe 'Otua ia e ngaahi tu'utu'uni. Koe mo'oni, 'oku mahino 'aupito 'a e 'Otua: koe me'a fakamohenga ke 'ihe vaha'a pe ia 'oe husepaniti moe uaifi, tangata moe fefine, pea 'i he 'uhinga lukufua pe 'oe mali. Koha toe me'a ia 'i tu'a ai koe ANGAHALA ia.
Matiu 5:27-30 - Sio ko hono mamafa 'o hono to'o 'e Sisu 'a e ngaahi palopalema ko ia 'oku Ne fetakai mo ia. Ko e ha 'a e tefito'i me'a 'oku fehu'ia heni?
Neongo pe koe ha 'a hono lahi 'e 'etau feima'u ke fakamamafa (pea 'oku totonu 'aupito ia) 'i he kelesi moe fakamolemole kotoa pe 'oku hifoaki 'e Sisu ki he kau angahala, 'oku 'ikai lava ia ketau fakangalo'i 'a e ngaahi tu'unga ma'olunga 'oe 'ulunggnag lelei ko ia 'oku Ne mo'ui'aki mo malanga'i. 'Oku faingata'a ia ketau faka'uta ki he anga ko ia 'o hono tala malohiange 'e Sisu 'a e fakatokanga ko ia ki he angakovi fakakakano hange ko ia na'e fakahaa'i 'i he ngaahi veesi si'i ko 'eni. Kape'i ho mata? Tutu'u ho nima? Kapau koe me'a 'eni ke fai ai e ma'a, ta 'oku mahu'inga; ka 'ikai ia, 'oku ke 'i ha fakatu'utamaki ko ia 'o e mole 'a ho'o mo'ui ta'engata.
"Kapau koe katoa 'o kitautolu ko ia 'oku tau pehe 'oku tau talangofua ki he lao (fono) 'a e 'Otua 'oku tau 'ataa mei he angahala, 'e fakamo'ui leva hotau laumalie, ka 'oku 'ikai. Pea na'a mo kitautolu ko ia 'oku tau pehe tetau tauhi 'a e ngaahi fekau kotoa 'a e 'Otua 'oku tau halaia kitautolu i he angahala 'o e tono. Koe ha leva 'a e me'a tetau fai ke ue'i ai hotau ngaahi ongo fakapotopoto kuo mamate? Koe tefito'i mo'oni ko ia 'oe 'ulungaanga lelei 'oku fakaapapau'i 'oku fai, 'oku hoko koe malu'anga pe ia 'e taha 'oe Laumalie."
Neongo pe koe ha 'a hono malohi 'o e fakatokanga heni 'a Sisu, kuo pau ke 'oua na'a ngalo 'iate kitautolu 'a e talanoa ko ia 'oe fefine na'e ma'u 'i he'ene tono tangata (Sione 8:1-11). Tetau ma'u fefe 'a e palanisi totonu 'i he vaha'a ko ia 'o hono pukepuke 'oe ngaahi tu'unga ko ia na'e talanoa kiai 'a Sisu 'i he ngaahi veesi 'i 'olunga lolotonga ko ia 'i he taimi tatau 'oku Ne 'alo'ofa mo manava'ofa kiate kinautolu ko ia 'oku hinga, hange ko ia na'e fakahaa'i 'i he talanoa ko 'eni.
'I he ngaahi founga lahi ko hano 'ilo'i totonu 'o e 'uhinga ko ia 'o e lelei pe kovi fakalaumalie, tautautefito ki he ngaahi angakovi fakakakano, 'oku fepikitaki mahino ia mo hano 'ilo'i totonu 'o hotau tupu'anga. Fakatata'aki 'eni: 'Oku 'ikai ke 'omai 'e he filosofia faka-atamai pe fakaevalusone ia ha makatu'unga totonu kiha fa'ahinga fehokotaki 'i he vaha'a ko ia 'o e me'a FAKAEMOHENGA pea moe LELEI pe KOVI FAKALAUMALIE.
'Oku lahi 'a e fa'ahinga kehekehe ia 'oe "FA'UNGA FAKAMALI'I" 'o e fanga manu. Koe fa'ahinga 'e ni'ihi 'oku nau mali tokolahi; koe tokolahi leva ia 'oku nau tuifio. Koe fa'ahinga tokosi'i pe 'oku lahi mali tokotaha, ka kuo fakahaa'i 'ehe ngaahi ako ia ki he tukufakaholo koe fa'ahinga tokolahi ko ia 'oku 'asi 'oku nau mali tokotaha 'oku 'ikai mo'oni ia. 'I he fa'ahinga tokolahi, 'oku lava ke fanau'i 'eha fefine (Ngaahi me'a mo'ui fefine, Fa'ahinga Me'a Mo'ui fefine) ia ha fanau tokolahi 'oku 'ikai kenau tamai kotoa kinatutolu ki he toko taha tatau. Koe ta'e 'iai ko ia 'a e tu'unga totonu 'o e lelei pe kovi fakalaumalie ko ia kuo foaki mai 'ehe Taha-Fakatupu, 'e 'ikai leva ke 'iai ha makatu'unga ia ki hono fakamahu'inga'i ko ia 'o e'ulungaanga fakamohenga pe 'olu lelei pe kovi. Koe teke lolotonga ko ia ke tali 'a e nofo fakatangata mo fakafefine 'oku ne fakatata'i 'a e poini ko 'eni. Koe Fakatupu pe taha 'oku mahino fakalelei ai 'a e mali.
Fakatou'osi 'a e Fuakava Motu'a moe Fuakava fo'ou, 'oku ngaue'aki 'a e va fakamali ke fakafofonga'i 'a e fakataha 'ofa mo toputapu ko ia 'oku hoko 'i he vaha'a 'o Kalaisi mo Hono kakai. Ki he fakakaukau 'a Sisu koe fiefia ko ia 'o e katoanga mali 'oku tuhu ia ki he fiefia 'oe 'aho ko ia te Ne 'omai ai ki 'api Hono mali ki he fale 'oe Tamai, pea 'e nofo ki lalo 'a e kau huhu'i pea moe Taha-huhu'i 'i he 'ohomohe (sapa) ta'ane (mali) ko ia 'o e Lami.
No comments:
Post a Comment