LESONI 32 (FAKATUPU) - KOHA TONUHIA KE FAKA'ILOA

'I he kotoa 'o e Tohitapu 'oku tau ma'u ai koe tali ko ia 'a e 'Otua ki he angahala'ia 'a e tangata 'oku natula fakahuhu'i pea faka'ai'ai 'ehe 'ofa mo'oni moe ta'e siokita. Na'e mei fakatonuhia'i kakato Ia 'i hano tuku atu 'a Atama mo Ivi ki he malohi faka'auha ko ia 'o Setane, hili ange kotoa ia , na'ana fai 'ena fili . Ka na'e afio'i 'e he 'Otua na'e 'ikai mahino ia kia 'Atama mo 'Ivi 'a e 'uhinga kakato ko ia 'o e me'a na'ana fai, pea na'a Ne fakapapau'i ke tuku ange kiate kinaua ha faingamalie ke toe fakatokanga leleiange pea ke na lava 'o toe fai ha fili.

Loma 5:6-11 - 'Oku tokoni fefe mai 'a e ngaahi veesi ko 'eni kiate kitatutolu ke mahino koe ha 'a e 'uhinga 'o e 'alo'ofa 'a e 'Otua?

Koe taimi oku faihala mai ai ha taha, 'oku tau loto ke fai mai ha kole fakamolemole ki mu'a ketau tali 'a e taha fai hia ketau toe va lelei mo ia. Koe mo'oni ia, 'oku taau pe a e kole fakamolemole ia 'i ha fa'ahinga tu'unga pehe. Koe kakato ko ia 'o hano fakamo'ui ha va kuo maumau 'oku kau ai hano fakahaa'i e mamahi mo hono tali e mo'ua (fatongia'aki) ko ia 'o e faihala. Ka na'e 'ikai tatali 'a e 'Otua ia kiate kitautolu ketau kole 'a e fakamolemole, na'a Ne kamata pe 'e Ia. Lolotonga koe kau angahala kitautolu, na'a Ne foaki Ia ke pekia ma'a kitautolu. Ko hano fakatata'i fakaofo 'eni 'o e 'Ofa faka-Otua.

'Oku fakatatau'i fefe hotau 'ulungaanga pea moe 'ulungaanga ko ia 'o e 'Otua? Koe ha hano lahi 'o 'etau fa'a mamahi mo 'ita pea kumi ke sauni 'o 'ikai kumi ki he fakalelei? 'Oku totonu ia ketau fakamalo ta'e tuku 'oku 'ikai pehe'i kitautolu 'ehe 'Otua.

Koe ngaohi ko ia 'ehe 'Otua 'a e kakai angahala 'oku fakahaa'i ai 'a e 'uhinga mo'oni ko ia 'o e 'ofa. 'Oku 'ikai koha ki'i ongo noa pe ka koe tefito'i mo'oni'i 'ulungaanga 'oku tuku kiai 'a e ivi kotoa ke fakalelei'i 'a e taha fai hia pea moe taha mamahi pea toe fakafo'ou 'a e va. Koe ngaohi ko ia 'ehe 'Otua 'a 'Atama mo 'Ivi koe fakatata ia 'oe founga 'o Ene felave'i mo 'etau angahala.

Koe Pekia ko ia 'o Sisu 'i he Kolosi 'i Kalevale koha ui ia kiate kitautolu pea ke tonu ke ongo ki he loto pea moe loloto taha. 'I he taumu'a ko 'eni e fakatonuhia'i ai kitautolu 'o kapau tetau fakahaa'i 'a 'etau loto mafana mo e tafoki 'osi mei he angahala.

Ko e Kalaisi ko ia, fungani 'aupito, tonuhia 'aupito, fakaofo 'aupito, pea ke faingata'a'ia 'i ha fa'ahinga pekia mamahi pehe, 'o fua 'a e mamafa 'oe ngaahi angahala 'a mamani, 'e 'ikai teitei lava ia he'etau ngaahi fakakaukau mo 'etau mahalo 'o makupusi mo mahino'i kakato. Pea he 'ikai pe ketau lava 'e kitatutolu ia 'o fua 'a hono falahi, ma'olunga, mo hono loloto ko ia 'oha fa'ahinga 'ofa fakaofo pehe 'Ene loto ke mole 'Ene mou'i ma'atautolu. He 'ikai tetau lava 'e kitautolu 'o totongia fakafoki, pe makupusi 'a e 'ofa ko 'eni, pea koe founga pe 'e lava ai ke totongi fakafoki ha 'ofa pehe ko 'etau poletaki ketau hoko ko ha ngaahi me'a ngaue Kene Ngaue'aki.